Türkiyəli müğənni Yıldız Tilbe qəza törədib. Miraj.az Türkiyə mediasına istinadən xəbər verir ki, ifaçı idarə etdiyi avtomobillə motosiklet sürücüsünü vurub.

Qəza günorta saatlarında İstanbulun Maltepe İdealtepe məhəlləsində qeydə alınıb. Yıldız Tilbe Bağdat prospektinə dönmək istəyərkən Kadıköy istiqamətində hərəkət edən motosikletlə toqquşub. Hadisənin ardından müğənni yaralıya yardım etməyə çalışıb. Əraziyə polis və təcili tibbi yardım cəlb olunub. Yaralı xəstəxanaya, Tilbe isə ifadəsi alınmaq üçün polis bölməsinə aparılıb.

“Motosiklet qırmızı işıqda keçmək istəyərkən qarşıdan maşın yoluna döndü. Sürücünü gördüm, qadın idi, amma kim olduğunu bilmədim. Təcili yardım çağırdıq. Qəzanı törədən kədərli idi. Sonradan bildim ki, Yıldız Tilbedir. Yaralının başından ayrılmadı. Hətta onun başını qolunun üstündə saxladı” – deyə, hadisə şahidi bildirib.