Əməkdar artist Fərqanə Qasımova qızı Fatimənin Xalq artisti Natiq Şirinovun oğlu Ümidlə ailə qurmasından danışıb. Miraj.az xəbər verir ki, o, rejissor Nail Naiboğlunun “Qırmızı” layihəsinə açıqlamasında bunları söyləyib:

“Bilirdim ki, tez qayınana olacam. Çünki ilk övladım qızdır. Qızlar tez ailə qurduğu üçün buna şansım var idi. Qızımın və Ümidin ailə qurmasında böyüklərin əli yoxdur. Bu, cavanların özlərinin bir-birinə olan baxışlarından və ünsiyyətdən olan münasibət olub. Biz də onların izdivac fikrinə “yox” demədik. Alim Qasımovun ilk nəvəsinin toyu idi. Bir də Fatimə ailəmizin sevimlisidir. Ona görə sevinirdik”.

Fərqanə Qasımova “Natiq Şirinov necə qudadır” sualına “Allah bu sevinci nə bizə, nə oğlan evinə çox görsün. Əsas odur ki, Natiq Şirinov evinə gələn o qızı, gəlini öz övladı kimi sevir” cavabını verib.

Xanəndə tezliklə nənə olmağı arzuladığını da gizlətməyib.

“Fərqanə həyat yoldaşını bağışlayıbmı” sualına ifaçı “Hə” reaksiyasını verib.

Xatırladaq ki, Fərqanə Qasımovanın həyat yoldaşı Elnur Mövlamov həbs edilib. O, Cinayət Məcəlləsinin 180.2.4 (Soyğunçuluq) və 178.3.2 (Dələduzluq) maddəsi ilə təqsirli bilinir. İş üzrə zərərçəkmiş qismində Alim Qasımovun həyat yoldaşı Tamilla Aslanova və qızı Fərqanə Qasımovanın produseri Rəşadət Fərzəliyev tanınıb. Bakı Ağır Cinayətlər Məhkəməsinin hökmü ilə Elnur Mövlamova 9 il həbs cəzası verilib. Xalq artisti Alim Qasımovun evindən pul və qızıl-zinət əşyalarını oğurladığına görə həbs edilən kürəkəni Elnur Mövlamov Bakı Apellyasiya Məhkəməsinə şikayət edib. Onun həbs müddəti bir il azaldılaraq 8 ilə endirilib.

Fərqanə Qasımova bir neçə il bundan əvvəl rəsmi olmasa da, həyat yoldaşından ayrılıb.